Rev 7 | MED | STEP | Uⱡ itim nimbᵾ pora nilinga kᵾn, wote na ndi, kundᵾr mel, anggelo tᵾmbᵾkak kat ndi, ya mᵾi kᵾmp monmᵾn ei nga mᵾi punt tᵾmbᵾkak tetᵾm ila, elpa elpa anggilik molk. Mᵾi ei nga kona kᵾpkᵾ tᵾmbᵾkak kᵾⱡ imp morum. Uⱡ etᵾng ei ndi, mᵾi na, num kuta na, nde mel mbᵾ kᵾpkᵾ ropa kᵾn, rowa ni nᵾnangga nᵾk etᵾng.

Revelation of John 7

Isrel Wamp 144,000

1 Uⱡ itim nimbᵾ pora nilinga kᵾn, wote na ndi, kundᵾr mel, anggelo tᵾmbᵾkak kat ndi, ya mᵾi kᵾmp monmᵾn ei nga mᵾi punt tᵾmbᵾkak tetᵾm ila, elpa elpa anggilik molk. Mᵾi ei nga kona kᵾpkᵾ tᵾmbᵾkak kᵾⱡ imp morum. Uⱡ etᵾng ei ndi, mᵾi na, num kuta na, nde mel mbᵾ kᵾpkᵾ ropa kᵾn, rowa ni nᵾnangga nᵾk etᵾng. 2 Ni kᵾn, na ndi, kundᵾr mel, al ant oⱡa orum orunga anggelo ti urum ei ndi, Got kont morum ei nga tip timal ti, etpa mepa omba kᵾn, anggelo tᵾmbᵾkak kat, Got ndi, ronduⱡ ngumba kᵾn, num kuta na, mᵾi na mbᵾ etᵾk, kit mundeing nitim kᵾⱡ, ronduⱡ wi rurum. 3 Wote, anggelo ei ndi, nimba mel, “Enim ndi, tᵾkrᵾk num kuta na, mᵾi na, nde na mel mbᵾ, etᵾk kit mundi nᵾmᵾndᵾi! Unt Got nga kongun wamp mbᵾ nga mᵾi ombil ila, tᵾn ndi, Got nga tip timal ei, mon ropᵾn pora ndamina kᵾn, wote enim ndi, mᵾi kona mel mbᵾ, etᵾk kit mundeing,” nitim. 4 Wote, Got nga tip timal ei, wamp namba iti ndi, tᵾtᵾng uⱡ ei, na kundᵾk nᵾtᵾng ila pit. Isrel wamp rᵾⱡaip elpa elpa mormun ei nga wamp 144,000, Got nga tip timal ei tᵾtᵾng.

5 Ei kᵾn, Jura wamp rᵾⱡaip ila 12,000 Got nga tip timal tilingina, Rupen nga rᵾⱡaip ila 12,000 tilingina, Gat nga rᵾⱡaip ila wamp 12,000 tᵾtᵾng.

6 Wote, Asa nga rᵾⱡaip ila wamp 12,000 Got nga tip timal ei tilingina, Naptali nga rᵾⱡaip ila wamp 12,000 tilingina, Manasa nga rᵾⱡaip ila wamp 12,000 tᵾtᵾng.

7 Omba Simiyon nga rᵾⱡaip ila wamp 12,000 tilingina, Lipai nga rᵾⱡaip ila wamp 12,000 tilingina, Isikar nga rᵾⱡaip ila wamp 12,000 tᵾtᵾng.

8 Wote, Sepulun nga rᵾⱡaip ila wamp 12,000 tilingina, Josep nga rᵾⱡaip ila wamp 12,000 tilingina, Benjamin nga rᵾⱡaip ila wamp 12,000 tᵾtᵾng. Wamp rᵾⱡaip mbᵾ pora, Got nga tip timal ei, tᵾk pora ndurᵾng.

Wamp Rᵾⱡaip Mam Ei Ndi, Got Kᵾn Mbi Paka Rorung

9 Wote na ndi, kundᵾr mel, wamp rᵾⱡaip mam ti, mᵾk rok morung ei, wamp ti ndi, kᵾmp ring mel kapⱡa mon. Wamp mormin mbᵾ, rᵾⱡaip na, mᵾi kona na, kᵾng na, ik na mbᵾ elpa elpa mbᵾ, Got nga rᵾpᵾndi pol ila kᵾn, Sipsip Waⱡ raⱡ nga kuimp keta ila anggilik kᵾn, muⱡ rᵾⱡ kurᵾmᵾⱡa mat pakᵾk, ki mbila yaⱡa ongum mat, ambulk morung. 10 Ni kᵾn, ronduⱡ wi rok nᵾk mel, “Tᵾn nga Got rᵾpᵾndi pol ila moⱡnga kᵾn, wamp etpa ti uⱡ ei, Sipsip Waⱡ ei kᵾn, kandᵾp tᵾtmᵾn,” nᵾtᵾng. 11 Wote, anggelo nimbᵾ ndi pora, rᵾpᵾndi pol ila na, rᵾp wu mbᵾ na, mel kont mul tᵾmbᵾkak na mbᵾ, morung kona ni anggilik paⱡa etᵾk, tᵾkrᵾk ngurung. Wote, anggelo nimbᵾ ndi, rᵾpᵾndi pol ila nondpa mura rok mondᵾk, mᵾi kandᵾk, Got nga mbi paka rondrᵾng. 12 Mbi paka rondᵾk, nᵾk mel, “Ei kupa! Tᵾn nga Got ei kᵾn minal ambuⱡpᵾn paⱡpᵾn, elim nga mbi ou ei nga nᵾndpᵾn itamin. Got ei, pilpa kungᵾndi kai mbᵾ nga pora puⱡi ei nga, tᵾn ndi, Got kᵾn angge nimbun, elim nga mbi paka rondpᵾn itamin. Got ei, ama ronduⱡ purum ei ndi, uⱡ ronduⱡ mam mbᵾ, elim kᵾn mint rᵾk rᵾk tetᵾm. Ei kupa mint!” nᵾtᵾng. 13 Wote, rᵾp wu ti ndi, na waldpa, nimba mel, “Wamp mat, muⱡ kurᵾmᵾⱡa ruⱡ pakᵾnmᵾn mbᵾ, naka wamp mbᵾ nda, wote kona nant ila molk orung wamp mbᵾ nda?” nitim. 14 Ni kᵾn, na ndi, punt rop nᵾmp mel, “Nim na nga rᵾp wu ei! Nim ninim pᵾtᵾn ei ka!” nit. Wote, rᵾp wu ni ndi, yant ndupa, nimba mel, “Wamp kan mbᵾ, el rui wamp mbᵾ nga ki mbila, mindil mbun mam mbᵾ tᵾk kᵾn, Sipsip Waⱡ ei nga mema ei ndi, muⱡ mbᵾ ⱡumᵾiya roⱡnga, kurᵾmᵾⱡa itim. 15 Uⱡ i etᵾng ei ndi, akup Got nga rᵾpᵾndi pol ei nga, kuimp keta ila anggilik kᵾn, rumbuldi rᵾnggilmᵾ raⱡ, Got nga manga wingti ila molk, Got nga mbi paka ronduⱡmina kᵾn, Got elim rᵾpᵾndi pol ila moⱡpa, wamp mbᵾ rᵾp etpa morum. 16 Got ndi, wamp mbᵾ rᵾp etᵾm uⱡ ei ndi, wamp mbᵾ kump kun kuⱡi nᵾⱡing, nu waka ti mon, kona ant ronduⱡ nui nanᵾmba, kᵾng orunga mindil etpa, muⱡ etpa, iti natᵾmba mon ku. 17 Uⱡ ei, nambuⱡ emel, Sipsip Waⱡ ei, rᵾpᵾndi pol ruk ting ila nga moⱡpa kᵾn, wamp mbᵾ rᵾp etᵾm. Wamp mbᵾ, nu waka kuⱡᵾng ei kᵾn, Sipsip Waⱡ ei ndi, mepa pangga kᵾn, wamp kont mul nu kut ila nu nuing. Got ndi, wamp nga ka net mana om mbᵾ, kil ngundᵾmba,” nitim.